Энэхүү “Он цагийн товчоон” нь Хүчирхийллийн эсрэг үндэсний төв (ХЭҮТ)-ийн 1995 оноос өнөөг хүртэлх 30 жилийн хөгжлийн замнал, нийгэмд оруулсан хувь нэмэр, тэмцлийн түүхийг баримтжуулсан бүтээл юм. ХЭҮТ нь гэр бүлийн хүчирхийллийг хүний эрхийн ноцтой зөрчил болохыг анх удаа олон нийтэд ил гаргаж, хүчирхийллийг үл тэвчих нийгмийн хандлагыг төлөвшүүлэх их үйлсийг эхлүүлсэн билээ. Өнгөрсөн гучин жилд тус төв хүчирхийлэлд өртөгсдөд зориулсан анхны түр хамгаалах байр, итгэлийн утас, сэтгэл зүй, хууль зүйн үйлчилгээ, хүчирхийлэл үйлдэгчийн зан үйлд нөлөөлөх хөтөлбөр, нэг цэгийн үйлчилгээ, хамтарсан багийн арга зүй зэрэг олон санаачилгыг амжилттай нэвтрүүлж, эрх зүйн шинэчлэл, бодлогын түвшний нөлөөллийг манлайлан ажиллаж ирлээ. Эдгээр амжилтын ард ХЭҮТ-ийн үе үеийн хамт олон, сайн дурынхны итгэл, зүтгэл, сэтгэл шингэсэн бөгөөд тэд хүний эрх, шударга ёсны төлөө тасралтгүй тэмцсээр ирсэн юм. ХЭҮТ нь өнөөдөр үндэсний хэмжээнд үйл ажиллагаа явуулдаг, төр, төрийн бус болон олон улсын байгууллагуудтай хамтран ажилладаг, хүний эрхэд суурилсан үйлчилгээний гол төв болон бэхжижээ. Энэ нь зөвхөн Хүчирхийллийн эсрэг үндэсний төвийн түүх бус, Монголын иргэний нийгмийн төлөвшил, эмэгтэйчүүд, хүүхдийн дуу хоолой нийгэмд сонсогдох болсон тэмцлийн түүх юм. Өнгөрснөө дүгнэж, ирээдүйгээ чиглүүлэхийн тулд энэхүү товчооныг эмхэтгэв.
















